أنا…….منكم حكايتي ليكم اليوم كتقول…..تعلم الحجامه في راس اليتامى

بقلم سميرة بار

سيدنا انبدا ليكم بجوج مقولات عندهم معنى كبير في حياتنا و هما علاش طالع الفيلم ديالنا:
“المال والبنون زينة الحياة الدنيا”،سورة الكهف الآية 46.
“الواحد إموت على ولادو ولا بلادو”، شعار ما يعرفوا و يأمن بيه غير كل وطني حر.

بعدا قبل ما نبدا تحياتي و تقديري لكل حجام كيخدم بعرق كتافو و يدخلها حلال، حيت على الأقل هذا الشخص كيدير خير فالناس كنقيهم و ينقي حالتهم و كيوضع لمست “نيو لوك-NEW LOOK”، إضافة لهذا كيدي أجر حتى مع الله حيت”النظافة من الإيمان”.
و انا أعوذ بالله من قول كلمة أنا، ملقيتش حسن من هذا المصطلح الشعبي البسيط اللي كنستعملوه في حياتنا اليوميه باش نتاقدو بيه شي أمور كنشوفوها كتوقع غريبه و عجيبه.

دابا اعباد الله بنادم كيدخل صح سلام لشي صبيطار كيخرج معطوب!!!!
واش فعلا كيف قلت المستشفيات ولات كينطابق عليها المقوله الشعبية “تلعم لحجامه في راس اليتامى !!؟”
واش حنا في مغرب الحضاره ولا مغرب يأمن فقط بالجزاره؟
بالله عليكم أيها العباقره، واش زعما منين كتنعسوا فالليل كيجيكم نعاس عادي؟
زعما شي واحد فيكم منين كيدير شي مصيبه بإسم الصحه كينشط و يبسط؟
ولا نعاود نقولها نيت “تعلم الحجامه في راس اليتامى “.

تصور تكون كتخرج تخدم و دمر و ضرب تماره ديال بصح و تغامر بروحك و حياتك باش تؤدي الواجب ديالك كوطني مخلص لوطنه، و تكون من الناس اللي بغاو ايموتو و يخليو مراهم ذكرى جميله اللي اتفكروهم بيها الآخرون و يترحمو عليك بالخير و تبقى بعد رحيلك مثل يحتدى به َ قدوه للأجيال القادم، لكن للأسف منين كتكون كتعيش وسط مجتمع و بيئة مكتساعدكش باش تحلم هذا الحلم المشرف و كتلقى راسك في وسط لا يأمن إلا بمقولة “أنا و من بعدي الطوفان” غادي تحس بالضيق و الحركه.
نعم الحكره و ما ادراك ما الحكره، حيت منين كتدوز نهار طويل و عريض و ترجع وسط ولادك باش تكمل معاهم نهارك كيف جميع ناس و تحاول تنسى وسط ضحكتهم البريئه و قبولاتهم الحارة و احضانهم الدافئة التعب و الضغط اللي عشتيهم نهار كامل باش تكسب لقمة العيش الحلال، و تلقى واحد من بين فلذات كبدك مريض يتألم و كنتظر لعوده ديالك باش تنقدوا و داويه، لأن الطفل لا يشعر بالأمان إلا بين يدي والديه، و لا يضع ثقته إلا فيمن يثق فيه والديه .
و رغم الشقاء و العناء في سبيل لقمت العيش و تأديت الواجب و خدمة الوطن و التعب و الإرهاق و ضغط منين كتشوف طرف منك كيعاني قلبك كيتفزع و كتولي باغي تحيد روحك و راحتك و تعطيهم ليه باش تشوفو مرتاح و صحتوا بخير.
و الكارثه أنك كإنسان و مواطن كتأمن بقدرات و كفاءات أطر بلدك كتجري و انت كلك امل ان هدوك ناس هم من يمتلكون العصا السحرية باش ارجعو فلذت كبدك لبر الأمان و يوقفو بكل إخلاص المعانات ديالو و ألام ديالو……
لكن للأسف الشديد منين كتوقف على الواقع و الحقيقه المره، كتكتاشف بأن هؤلاء الأشخاص هم أعداء الوطن و المواطن بإمتياز.
للأسف تقدر دخل و انت كتعني من “X” اتخرج من عندهم و خلينها على ديك “X” كثر و زادوك مازال عليها “Y-Z”، و الأكثر بئس من هذا أنهم كيشوفو فيك و يتعاملوا معاك كأنك مجرد ……بلا ما نقولها ليكم لفاهم افهم.
حيت فعلا لو كانوا كيشوفونا مهمين و يتذكرو القسام اللي اداوه باش ابداو ازاولو المهنة مغاديش نشوفو شي واحد كيشكي و يبكي، و لكن كيف سبق و قلت و نعاود نقولها للأسف الشديد نحن “اليتامى اللي كيتعلمو فينا الحجامه”، نحن من يفهم معنى “نموت على ولادي ولا بلادي”، نحن من نأمن ب”المال و البنون زينة الحياة الدنيا”.
اما هم….نعم هم من يقولون: “ايها البؤساء الحالمون، نحن من سيعلمكم معنى انا و من بعدي الطوفان”.

…….إنتهى الكلام.