انا…..منكم حكايتي ليكم ليوم على …السوبرمان بمساندة الكاميرا الخفيه حاجتوا مقضيه.

بقلم سميرة بار

رمضان على الأبواب الله ادخلو علينا بالصحه و العافية….اه….كنقصد العافيه زعمه نكونو بيخير و على خير كيف كيقولو آشقائنا المشارقه ماشي العافية اللي كنعرفو حنا الله انجيكم و ينجينا منها.
و بهذه المناسبه العظيمه صحاب الكاميرا الخفية اتكون زاهية عندهم القضية، غير باش نتفاهم معاكم من الأول راه صحاب الكاميرا الخفية أنواع، كاينين فيهم اللي كيديروها تحت شعار “مع الفطور الشعب من كترث الظحك اللي انتجوه ليه بالظحك ايذوخ” و لكن بلاتي هاد شي طبعا كيستافدو ماديا منو مكيناش شي حاجه “لله في الله”، و كاين عوتاني اللي عندو الكاميرا الخفية من نوع آخر، اللي كتكون تحت شعار “السوبر مان بمساندة الكاميرا الخفية على الشعب ايدوخ و حاجتو منو مقضية”.
دابا حنا و في عز الازمه و كلشي حاس بالظلم و القهرة……….كيجي السوبرمان عليه الأمان، و يبدأ فالدرويش يشرشم و يتهكم باش فالطوندونس اظهر و يبان عليه الأمان، ما يضرب حسبه واش جرحو ولا قهرو ولا ظلموا، باش معالي “الشاف سوبر ابقى دائما مهيب و شان”.
ولكن باش نكون عادله و حقانيه راه الكاميرا الخفية اللي كتصور لرمضان ليها حل و كتكون خفيفه ظريفه على الناس ما كضر حد و ما كتكرفص على حد كلشي كيكون بتفاهم و بالتراضي و فاللخر كلشي كيضرب الكاشي و كيتبسط.
أما الكاميرا الخفية اللي كتكون تابعه لسوبر مان باش تكون حاجتو مقضيه، ماكيهمها حتى إنسان، لمهم عندها الكاش ديالها فداك لمكان و رزقها بعد الله على لسوبر مان.
تخيل معايا واحد غير كيكون جالس ما عليه ما بيه حتى كينوض اش كاين ما كاين اجي ندير حملت الواد على ولاد لجواد، و لكن ما غديش نخرج هكذاك…..
السوبر مان: ألو ألو ألو حميده……..
حميده: وي شاف….أمر و انا مغامر.
السوبرمان: جيب لي أحسن وليدات عندنا كيبدعو في الكاميرا الخفية بغيت الليله نبات طالع فالطوندونس و تزهى عندي القضيه……
حميده: ما يكون غير خاطر الشاف ديالي….و لكن راك عارف ايسولوني، اشنو ندير معاهم فالكاشي؟
السوبر مان: حميده….. الشغل ايكون بحال ديما راك زعما ولد الضومين و حريفي….تاصل دابا بالباتول الفضوليه اتلقى عندها الزرقه فالامن و محضيه.
حميده:سمح لي الشاف مقصدتش….راك عارفني قاد بشغلي و فايتو لهيها…غير مرا مرا ولدياتنا منين مكتكونش الزرقه كتهون عليهم العشره، و كيتقلقو اللهم اشوفها فيدي باش اتهناو و يتشجعوا….و متنساش راك عارفهم ديما كيقولو لينا مافيكم ثيقه أولاد عتيقه، منين كتبغيو تبانو ناضيين كتفكرونا و في الأيام الزينه و العواشر كتكونو نسيتونا .
السوبرمان:….حميده دير خدمتك و باركه عليه من تفلسيف و لهضره لخاويه، دابا سمعني مزيان، انوجد راسي نخرج دابا انا و لغلمان ديالي……..راهم موجدين لوتر و مقادين الميزان، راك عارف فين اتلقاني، و قول لدوك لوليدات اجيبو معاهم كلشي برو و ميفلتو حتى حاجه……عنداك دير بحال ديك لمره هادوك اللي جبتي و كلتي و شربتي و فاللخر تقلبو
حميده: هناك الله هادو اللي انجيب هد المره كيؤمنو بقوة بالمره، أما هادوك ديال داك نهار قالك اسيدي اش كاين ما كاين، ناض ليهم ضميرهم و جاتهم النفس على ولاد الجواد، قالولك اسيدي حنا منهم و خصنا نكونو معاهم ماشي ضدهم، راه بموجب سلطتنا الرابعه خصنا ندافعو على مصاليحهم و نكونو فجنبهم و الأهم نكونو حقانيين ماشي مرايقيين، حيت حرفتنا كتبغي بنادم ايكون كرشو ما فيها عجينه و ما يدخل روينه….
السوبرمان: هاي هاي هاي تحل ليهم لفم و تقاد و لكتاف
حميده: ….و نزيدك الشاف قالولك هما حرين و متحررين…..و ماعرفو لا بطمان و لا سوبر مان كيأمنو غير بالله-الوطن-الملك….و شعارهم اللي اطيح فالمقله يتقلى!!!
السوبرمان: صافي سكت سكت سكت متزيدش تكمل هادو باينه شربو من عوينت شيكيفارا.
اجي بعدا هادو اللي اتجيب مقارينش حرب النسا…زعما باقي فيهم ميتقدا؟!
حميده: وايه علاش زربت عليهم و جبتهم من حد عينهم مغمضين و باقي ما دخلو في المعماعه، راه نهار افيقوا و يعيقوا…..لخبار فراسك.
السوبر مان: لمهم رد لبال و مطوفش بأصحاب الضمير راه ما كينفع معاهم لا زرقه و لا عصير.
سيادنا لحق زوين و اللي مابغاه إلقاه إلقاه و لكذوب حبلو قصير و الإتم ديالو عظيم.
انا مع السوبرمان منين كيدير خدمتو نيشان و كيطبق القانون على الدويش و الكبير….و”الكبير و الله”و كيحتارم نفسوا، و كيكونو عندو ولاد لجواد بحال بحال ما يقول هذا من النوع A ولا هذا من النوع B و لا هذا من النوع C……
و غادي نكون معاه كثر و نساندو منين قبل ما يخرج اطحن الدرويش اللي قوت يوم كيكون غير مع لجواد و البهالي كيجمعو قطر قطر و بصبر فالحر و فالشتا و فالسمر و البرد و الليالي، باش ادخلها لولادو حلال و يكون بهيبتوا قدام حبابو و صحابو.
الدرويش اللي عايش غير بالحمدلله و دعاوي و الآمال ديالو فالله مكيوقفوش طغيان السوبرمان و لا الواقع اللي كيعانيه.
وخا يجيب ليه الكاميرا الخفية و خا يجيب ليه الغلمان واخا اجيب ليه…….غادي ابقى مقاوم و صابر و مكابر و مأمن ان في مغرب محمد السادس عمر السوبرمان ما يطغى و لا يتمادى…..حيت بكلمه وحده منو كيشد الصف و ما كتفافى.
فاالخر انقول…..السوبرمان دير خدمتك و طبق قانون و درس أفعالك، لموت كاينه و ما كيدوم غير أفعال الخير……لعيب ساهل اتجبد و يدار، أما لخير اللي صعيب، على هكذا كيقولو سيدنا اللوالى سعداتك يا فاعل الخير.
…………….إنتهى الكلام.