أنا……منكم….حكايتي ليكم اليومه على غلاء الأسعار و كيفاش مالين المحلبات كشوفوها.

بقلم: سميرة بار

مظاهرات غلاء الأسعار….بين مطالب مشروعة و فرصة للمفاوضات بين عمالقة المحلبات السياسية.

مصائب قوم عند قوم فوائد…..
انا و أعوذ بالله من قول كلمة أنا، هكذا كنشوف هاد لحريره اللي كنعيشوها في هذه الظريفة الصعبه، الغلاء ديال الأسعار طحن ماشي غير “الدرويش”، راه حتى الطبقه المتوسطه اللي كنفضل نسميها “الدرويش أوس إثنان” مسحها من الوجود، راه بسيف ما الشعب إسعره و يتجنن، كل مره لحكومه خارجه لينا بخبيره و حجايا، أما ديك “المحلبة الدولية” ولينا نشوفهم ديما داخلين عندهم بحال إلى كيديرو لكريدي عند مول لحانوت، و هنا باش متأولوش كلامي اولا تحية تقدير و إجلال لمالين لحوانت راني براسي بنت مول لحانوت و خدمت فالحانوت.
غير هو تشبيهي للسلف بين “المحلبة الام ديالنا” و “المحلبة الدولية” بمول حانوت ديالنا بغيت نبين بيه فضيحة “المحلبة الأم و فعايلها”.
حيت على الاقل مول لحانوت ديالنا الله إخلف عليه هاز حمل كبير مع ولاد الشعب و صابر معنا باش نقدرو على الاقل نكملوا الشهر و مايزيد عليك ما ينقص و لا يقولك خصك تعطيني “الفائدة على الكريدي”…..بلعكس حاشا و لله و من هذا المنبر كنقول لأي مول لحانوت الله إرحم لك لوالدين و يكثر خيرك حيث فعلا من غيرك الشعب كن راه وصل لثورة الجياع، حيت مع هاد لغلاء و زيادة فالاسعار المهولة وصلنا لواحد الدرجة خطيره و وصلات لينا الضربه للعظم، أما بالنسبة لكريدي لالة “المحلبة الأم” مع “المحلبة الدولية”….لا حديث و لا حرج، ماعرفت فين بغاو اوصلوا هاد لبلاد السعيدة، راه “لمحلبة الدولية” براسها خرجات كتكريتيكي فينا، و ياخوفي ايجي شي نهار تبدا تلعب علينا “10” و طبعا “المحلبة الأم متعاودشي الهضره” على قول الفنان الكبير “س.ل”….، اييييه بحال إلى كنشوفوا فيها راه ديون تراكمات و هما بالفرحات عليهم المغرب إغرق كريدي باش غدا و لا بعدوا إلقاو كيفاش إلويو يدينا و يطبقوا علينا السيناريو اللي دارو لواحد لبلاد مشهورة بطبق “أميغدالوتا” سنة 2014.

طبعا أنا مع حق الشعب اخرج فمظاهرات و يهضر على حاجه ضراتوا حيت “الساكة عن الحق شيطان أخرس”، و اللي كيوقع لينا حاليا لا يبشر بالخير…..البلاد غادية فالخسران احمادي .

و لكن متنساش أنه هناك حرب بارده بين القوى الخفيه اللي كتدور فدهاليز ما يروق لي أن أسميه ب”المحلبات سياسية”، راه بسباب فعايلهم الكحله الشعب خرج انتافض باش يطالب بحقه في العيش الكريم و الكرامه و فعايلهم المحله هي اللي خلات الشعب يقول “لمسؤولين المحلبات السياسية” و “المحلبة الأم”……”ياقوم المحلبات بجميع مكوناتها ها العار شوفو من حال الشعب اللي قهرتوه و قهرتو جيبو “……”شوفو من حال الشعب اللي ما بقاش قادر اشري نصف لتر حليب و بيدو ديال زيت”…….”شوفو من حال الشعب كان يتعجب من “صحاب المحلبات” ديال هادوك اللي “هوك” حيت خلاو شعبهم محروم و مضيوم…..لكن للأسف حتى لقى راسو ولا هو كثر منو محروم و مشتاق و جيعان”.

راه الخوت من الجميل جدا نخرجوا نهضروا على حقنا و نكلاشيو اللي طحنا و ضرنا، ولكن منين أحداث بحال هادي اللي كتعبر على الآلم ديال ولاد شعب كيستغلوها و كيركبوا عليها “اللي كيحلبو المحلبه ” مكتبقاش شاده السكه اللي كتكون غادية فطريق الصحيحه، بلعكس راه كتولي تخدم لصالح المصالح ديال “مالين لمحلبه” بدون إسثتناء.

راه كلامي واقع….مالين لمحلبه قسما بالله ما كيهمهم اش كيوقع بقدر ما كيهمهم ازمتوا اللي شاد الروبيني و كيفرق علينا و عليهم المؤونه……شي كيقلب إطحن شي و شي كيقلب اركب على الموجه ضد شي باش يبين راسو و يضرب على 5 سنوات جايه ثاني و هي غاديه.

أما باش يجي شي مول لمحلبه يقولي حنا منكم و معاكم و حاسين بيكم، غادي نقولو إذا كان كلامك صادق افعل ما يلي :
1-تنازل على خلصتك لشعب.
2-ناضل بلا مدخل لمحلبه و كن على لقرس 24 ساعه على 24 ساعه.
3-وحتى ديك “العمره او مناسك الحج” اللي كيعطيوهالك فابور دوزها لشي درويش امشي بلاصتك فيها لعلى و عسى دعيواتو معاك من ذالك المقام اخليو خير محلبتك فايض.

ها انت ا سيدي مطلبتش منك بزاف غير 3 ديال لحويجات بساط خفاف كيوووووت إمكن لك تبين بيهم أن نيتك زين مع ولاد شعب .
خواتاتي المغربيات و خواتي المغاربه…..راه الخروج لشارع مرة واحد لا تكفى و ما عندها باش تفيدنا جميعا، راه باش نحاربو الفساد و التحراميات خاصنا نقتانعوا أن سيدنا الله انصروا ماكيخرجش من فراغ و يعمل خطابات هاذفه….راه يد وحده ما كتصفقش، راه منين صاحب الجلاله يقول في الذكرى 39 للمسيرة الخضراء: “إما ان تكون وطنيا أو خائن”، راه مقصدش فقط اللي كيبيعو البلاد برخيص او الانفصاليين اللي مولاهم و كترعاهم هاديك اللي “هوك” و أخواتها……، بلعكس إلى كنتي
بنت أو ولد لوقت والله حتى تفهم لمغزى و المقصود من كلامو، راه هناك مثال كيقول: “إذا بان المعنى لا فائدة من التكرار”، أي منين كيقول تكون وطني يعني تخدم بلادك من موقعك و تكون عندك النفس عليها و على مصالح خوتاتك و خوتك لمغاربه و تحيد منك الأنانية و سم و لحقد و لحسد و تمكريب و تمكريه و تفكر فالصالح العام اولا قبل الخاص…..و كلمة خائن توجهات لهادوك اللي كيسبقوا جيبهم و مصالحهم الشخصيه و كستغلوا نفوذهم باش اطحنوا اي واحد كيوقف ضد مصالحتهم و يقدروا يبيعوا خبار لبلاد و أسرارها للبراني ببضع دولارات او يوروهات.
ولاد و بنات بلادي آمنوا اننا معا و يد بيد اذا بدلنا لعقلية “المفلس” المتشبعه “بالآنا و راسي يا راسي” غادين ماشي غير غلاء الأسعار اللي انتاصرو عليه، راه غادين انبدلو بلادنا و نكونوا قدوه للأجيال القادمه.

راه لغلا ديال “زيت” و “مطيشه” و “البوصله” و “لحم” ماشي هو مشكلتنا الأولى…..راه مشكلتنا الأولى هي التبعية اللي كنديرو لصحاب لمحلبه من أجل “1000درهم” أو “200 درهم”، حيت من نهار حلينا عينينا متعلمناش فالمدرسه او مع ولدينا ان المسؤولين هما اللي مسيرينا و مقراوناش فالمدرسة بأنهم هم الأنبياء و الرسول اللي تكلم عليهم القرآن او اي كتاب مقدس، بلعكس من نهار حلينا عينينا حاجه و حدا اللي عرفناها فالدينا : والدينا و عائلتنا و اول شيئ تعلمناه و أمنا به هو شعارنا الموحد: الله-الوطن-الملك.

و في الاخير نبغى نقولكم فهذه البلاد السعيده اي فاسد بغى يتبوزق عليك واجهو بشجاعة و قوليه: ما كنعتارف إلا بشخص واحد “محمد السادس”.

انتهى الكلام ……….