انا .. منكم .. وحكايتي اليوم .. غادة تعجبكم، بطلها بيبي فايس BABY FACE

بقلم سميرة بار

أنا……منكم،

أنا و أعوذ بالله من قول كلمة أنا أؤمن بمقوله شعبية تقول: صاحبي…….هو عدوي!!!!!!

سيادنا ما كيان ما يتخبى كلشي “وضاح و بان”، على مقولة الفنانة الجميلة مولات الفيزا هي و راجلها، صحاب الوزير العظيم اللي الإبتسامه العريضه مكتفارقوش و انا شخصيا كنفضل نلقبو بمول “البيبي فايس-BABY FACE”، اللي كيهز الهم لعشرانو الفنانين باش ميتقلقوش منو و يصيفطولو أوديو فالواتسب و يقولو ليه مترجلتيش معانا الصاط فهاد اللعيبه.

إيوا ماذا سأقول بعد كل ما قيل نفتاتحو لمقال بمقولة المستشار المغضوب عليه من طرف صاحبو و حبيبو……

ياك قلت ليكم صاحبي هو عدويا!!
من نهار مول “البيبي فايس-BABY FACE” شد “تويزاريت” و عين لعديان و لمحساده و القواسه دايرا ليه التابعه فحياتو مسكين…..وبيني و بينكم أنا ديما كنقول: اذا تبعك التابعون إن لله وإنا إليه راجعون.

ها فضيحة “طوطو” ها فضيحة “الفيزة” ها فضيحة “المستشار ديالو عشيرو اللي غير طالقها تسرح فالسطوريات الانستغرام” حتى جابها فراسو……إييييييه الزمان احياني على اللي يثيق فيك، شوف كيفاش كدور ليام شحال وهو مسكين يدور و يجري و يقلب على ستونات باش إلمع بيها صورة و اسم عشيرو مول “البيبي فايس-BABY FACE” و فاللخر منين وقع اللي وقع و سخن الطرح ضربها ليه بنكره و طلعوا فالعمارية و كيف كنقولو حطوا “كبش فداء”، طبعا و اكيد ايحطوا كبش فداء لمصلحته و الكرسي و مكانته…..راه ميمكنش افضلوا على تويزاريت راه الفرصه الخوت مكتعوضش و لكن الصاحب كتعوض.

و إلى جينا نحسبها بالعقل وبدون لغة خشب، واش كاين شي واحد غادي يسخى بلقب “وزير”؟؟؟؟؟
طبعا لا و ألف لا إلا إذا كان باه هو مول شركة “تيسلا-Tesla” اللي كتصنع السيارات الكهربائية حيت ديك ساعات ايكون ضامن مستقبالو و عندو كلشي و ميحتاجش خدمه أخرى تهرس ليه راسو و هو ايكون مشغول بمشاريع العائلة و كيفاش ممكن ازيد أوسعها ويكبرها، آآآآآآآآآآآآه…..نسيت راه أصلا واخا مولدوش مول “تيسلا-Tesla” العفريت قدر إجمع واحد لبراكه ديال “50 مليون دولار”……على تقليدهم، هما اللي قالو أنا والله ما شفت بعيني، و قالك اسيدي اسثتمرها فشركة ناشئه في المغريب اتنافس “تيسلا-Tesla” إلى كتب الله و كمل لمشروع و مقوسوش عليه الحضايا و لمحساده و أعداء النجاح.

حيت واخا مول “البيبي فايس-BABY FACE” إقتدا بمقولة: “وقضوا حوائجكم بالكتمان”، صحابو بيعوا بيه مسيكين…..إيه لغير و لحسد حركوا مشاعر عشرانو و خرجوا لخبيره فالميكا ديالها باقي سخونه باش ميخليوهش افرح فخاطرو الله اسمح ليهم، حرشوا الشعب عليه قالوا لك حقا ما حقا…..ديك “50 مليون دولار” اللي دخل بيها مساهم فشركه ديال السيارات الكهربائية بنسبة “50 في المئة” من فلوس الشعب المغربي المغلوب على أمره!!!!!.

و هو مسكين انوض عليه النحل….ها الرأي العام ساخط عليه….ها صحافه تتشرشم فيه….ها المأثرين السياسيين كفرشخوا فيه…..وحتى الفنانين الكومديين عشرانو اللي خيروا سابق عليهم كلاشاو فيه……الله اسمح ليهم منوا يارب .

بعدا باش منساش واش شي واحد فيكم عندو رقم “إيلون ماسك” نعلموه اش ناوي مول “البيبي فايس-BABY FACE” ادير، دنيا و زمان هذا بحال والو اجمع ليه سوق حب و تبن و يخليه كيبكي و مضيوم، على هكذا قلت من الأحسن نعلموه باش اعرف راه عندو منافس قوي قدر اجمع ثروه فمدة سنه خدم عليها إيلون ماسك 10 سنين و دمر عليها، اللهم ايجي اتفاهم هو وياه و يكونوا شركاء و لا غدا و بعدوا ادخلوا فشد فيه…نقطع فيك، راه ولدنا مهندس خطير فالبيزنيس قاري حساباتوا و جامع راسو كعرف إدبر على الفلوس “حلالاً طيبا” و طموحاتوا كبيره اللهم لا حسد.

لمهم انا قلت نمسي عليكم قرائي الأعزاء بهاد لحكاية، من حكاية بيبي فايس BABY FACE