بقلم: سميرة بار
بغيت نعرف إحساس اللي منين كيشوف جدارميه فطريق و هو فكرشو العجينه كيفاش كيكون؟؟
أنا و أعوذ بالله من قول كلمة أنا كنقول يا إما كيقلب الطريق أو كيزعم و يكمل بحال إلى مكاين والو و يزرب عليهم بديك تحياتي الشاف أو كيقول الله اخرج هاد الطرح على خير و كيدوز حداهم و القفقافه راكبها.
هذا هو حال تريكت موليير مع المغرب، نعام السي….. المغرب و ما ادراك ما المغرب بلد السبعة رجال و الشرفاء، بلاد النية و أهل الخير و الكرم، و الحمدلله ربي عمروا خيب طريق بلادنا و رجاها فيه و كاع اللي كينوي فينا الغدر كتبان فيه العلامه.
باش تريكت موليير تحس باللي ركبها القالب مع بلاد السبعة رجال و تلقى الجدارميه غفلوها فيها و عمرو ليها البراجات في طريقها، داخت و تلفات ليها الحلوفه و ما بقات عارفه اش دير، راه الله احسن عوانها و يكون معها نيت، كثر عليها الرأي و “مسمار جحى” اللي “هوكا” فتى عليها بلانات جابت ليها الربحه، العاقلين منين كيبغيو اتشاوروا كيختارو ناس عندهم ماضي ثقيل و مشرف و رزين و تاريخهم كيكون عامر بالإنجازات العظيمه اللي كتكون بالبرهان و الدليل، أما ياربي السلامه تريكت موليير نهار ربي بغا يفضحهم فضيحة الجمعه و الناس مجمعه بلاهم “بمسمار جحى” اللي تاريخو كله مقلوب فالبردعه، مايعرفو لا اش يقدمو و لا اش يأخرو بلانتهم كحله زحله و طريقهم كلها شوك و اذا حطوا عليك العين عرف راسك صكع و مسخوط.
حنا و الحمدلله حفاد لجواد و الشرفاء محصنين بالسبعة رجال، منين تريكت موليير كثرات علينا تفلسيف و بغات تفرض علينا ابياتها الشعريه و تقتل القافيه، قلنا ليها حبسي حدك تما، حنا ناس تاريخنا على كل لسان.
أما ملوكنا عندهم شرعية و تعلمنا منهم ايكون كلامنا موزوون و كلشي بالقافيه.
و كيف كتشوفوا سبحان الله باش تعرف ونا مرضيين دعاوي واليدينا معطلوهمش سلطوا عليهم جدارميه، تلفوها على القبله و خلوها تندب و تشكي على ما دارو فيها.
ياك شحال من مره قلنا ليك بدلي مستواك و طلعي نيفوا معنا و لزمي حدودك ؟ ياك تبرينا منك قدام اللي يسوا و اللي ما يسواش؟ ياك انتي اللي بديتي و بغيتي تقلي لينا السم و تفرضي علينا كلامك؟.
ياك بعدا حنا صبرنا ليك شحال من مره و نعلنا الشيطان و قلنا منزربوش وخا هكذاك راه كلاو من خيرنا و شركو معنا الطعام.
ياك راعينا ليكم شحال من مره و قلنا لمسامح كريم غير غركم الشيطان دابا تنعلوه.
ياك لعبتوا علينا الدور ديال “رايه و سكينه” مع “مسمار جحى” و خرجتو عنيكم فينا؟
ايوا دابا كيف جيناكم منين تحديناكم؟ اش كاين؟ ياك بعدا تبتناكم و شديتوا الأرض و درنا ليكم لعصى فالرويضه؟
كيف جاكم حر الجدارميه؟ ياك كنا شادينهم عليكم و نعلنا شيطانهم فيك؟
شفتوا دابا لعب لبراهش فين كيوصل ماليه؟
راه يا لمساخيط خيرنا و رزقنا اللي كنتوا كتبرعو فيه حرمتوه على راسكم .
متنساوش راه لحم كتافكم ربيتوه بسبابنا و حنا اللي علمناكم كيفاش تعيشوا بيه.
علاه تريكت موليير اش كتكساب ؟ والو ….زيروووو
اما حنا سيادكم حفاد السبعة رجال من كل فن طرب.
اشمن فوسفاط…..اشمن معادن……اشمن توراث…..اشمن ثقافه…….وزيد وزيد لاداعي لذكرها كلها خوفا من حسد و العين….”اللهم بارك لنا في رزقنا”.
دابا من اللخر اتحدروا راس و تهزوا علينا شطايطكم و تخرجوا، ساعتكم سالات.
دابا جا وقت المعقول و صح ما كاين غير أرى برع مع جدارمية، و كنظن من كلامي عرفتوا علاش هما قادين؟؟؟؟ غير بلا ما تحاولو تلعبو معاهم لعب “الباتول الفضوليه”.
و لكن وخا هكذاك حنا ماشي ولاد لحرام وخا كليتو الغله و سبيتو المله غادي نحنوا فيكم و و نسولو فيكم مره مره.
الحمدلله تربينا على الإحسان و قلبنا بيض .
و اذا بغيتو تعرفوا المعدن ديالنا كيف داير سولو علينا “مسمار جحى” ف “70” من القرن الماضي فاش كرفسوا بناتنا و وليداتنا كيفاش حنا تعاملنا؟
طبعا ماشي خوف منا…..لا لا لا لا، بلعكس تعاملنا معاهم غير بأصلنا.
لمهم ردوا لبال و حضيو جنابكم و صفيو الخوت راه الجدارمية مكيلعبوش، طلبوا منا تسليم و شدوا جنب لحيط راه من هنا لقدام ما كاين غير تصرفيق.
………….إنتهى الكلام.
